Në kuadër të Javës së Eruopës, ministria e Jashtme prezantoi sot aplikacionin 'AMBASADA IME'. Kjo është një platformë dhe një aplikacion, një urë më shumë në komunikimin e drejtpërdrejtë mes Ministrisë së Europës e Punëve të Jashtme dhe qytetarëve shqiptarë brenda dhe jashtë vendit.

Kryeministri Edi Rama i pranishëm në aktivitet foli për herë të parë për debatin për heqjen e tabelave në Finiq dhe marrëdhëniet me Greqinë, veçanërisht për dosjen e kufirit detar. Përsa i përket negociatave, Rama u shpreh se Shqipëria i ka plotësuar detyrat e shtëpisë për hapjen e negociatave, por për vendimin final duhet që të priten zgjedhjet për Parlamentin Europian.

Ai u shpreh se KE-ja vitin e kaluar e miratoi dritën jeshile për këtë vit, por situata politike brenda disa vendeve të BE-së detyron pritjen për të parë se në cfarë situate do të gjenden. E ndërsa theksoi se askush nuk e di cfarë do të vendoset në qershor, Rama u shpreh i bindur që ky është viti që të gjitha rrethanat do të çojnë aty për të çelur negociatat.