br Publikimi i një videoje, në të cilën kryeministri i Norvegjisë maskohet si shofer taksie për të mësuar se çfarë mendojnë qytetarët e tij për punën e qeverisë bëri bujë në mediat botërore. Por mediat kanë zbuluar se Partia Laburiste e Jens Stoltenberg ka paguar me nga 64 Euro, pesë nga 14 pasagjerët që transportoi me taksi kreu i qeverisë. Partia në pushtet e pranoi këtë, por sipas zëdhënëses, klientët nuk kishin dijeni se do të ishin pjesë e një spoti publicitar për fushatën e rizgjedhjes së Stoltenberg. Zëdhënësja tha se në momentin kur mësuan se ishte pikërisht kryeministri ai që po i transportonte me makinë, edhe këta pasagjerë kanë patur një reagim spontan, pasi nuk ishin në dijeni të faktit. Asnjë nga këta 14 persona, nuk ka paguar para për udhëtimin. Videoja është realizuar në qershor, në bashkëpunim me një kompani këshillimore dhe do të transmetohet në televizion gjatë fushatës elektorale që mbahet në shtator. Megjithatë, ajo u postua para kohe nga kryeministri Stoltenberg në faqen e tij zyrtare në "Facebook". Veprimi shihet si një lëvizje e zgjuar e kampit qeveritar në Norvegji, pasi sondazhet i japin përparësi në zgjedhje opozitës konservatore. Jens Stoltenberg qeveris vendin nordik prej vitit 2005 dhe tashmë është në kërkim të mandatit të tretë.