Situata më problematike me çështjen e sigurisë ushqimore është në veriun e vendit, ku shumica e tregtarëve, por edhe konsumatorëve nuk janë të ndërgjegjësuar se tregtimi i produkteve në rrugë është i dëmshëm për shëndetin. Kështu në vende si Shkodra, Kukësi apo Dibra, inspektorët e Autoritetit Kombëtar të Ushqimit janë ndeshur në konflikte me tregtarët, të cilët në shumë raste nuk janë bindur, dhe është kërkuar ndihma e policisë. Në një intervistë për Vizion Plus, drejtori i AKU-së Afrim Bakaj thotë se në këtë gjendje që është sot kontrolli i ushqimeve në vend nuk mund të presim standarde në një ditë apo në disa muaj.