Ende pa u zyrtarizuar rezultati nga Komisioni Qendror i Zgjedhjeve në Kosovë, partitë politike kanë nisur kontaktet për formimin e koalicionit të ri që do të drejtojë vendin për katër vitet e ardhshme. Partia kryesuese, PDK i ka bërë ftesë të gjitha subjekteve për të nisur negociatat që do të çojnë në finalizimin e një marrëveshje. I vetmi kusht i vendosur nga kjo parti, është se posti i kryeministrit nuk negociohet, duke i dhënë një mesazh të qartë AAK-së së Ramush Haradinaj. Mediat vendase, citojnë burime pranë PDK-së se një nga opsionet është dhe koalicioni me LDK-në, dy parti këto që kanë bashkëqeverisur Kosovën, që nga fundi i vitit 2007 dhe deri në vitin 2010. Sa i takon subjekteve të tjera politike, Vetëvendosja është shprehur kundër bashkëqeverisjes me PDK-në madje këtë ia ka kërkuar dhe partive të tjera opozitare. Kurti konfirmoi një dite me pare për Vizion Plus, se po punon për një qeveri me LDK-në, AAK-në dhe subjektin më të ri politik, nisma e Fatmir Limaj, për të formuar një koalicion me bazë të gjerë, pa PDK-në e Hashim Thaçit. Përcaktues në formimin e koalicionit të ri qeveritar duket se do të jetë aleanca për ardhmërinë e Kosovës. Nga ky subjekt politik, nuk ka patur ende asnjë deklaratë për qëndrimet që partia me lider Ramush Haradinaj do të mbajë në këtë moment paszgjedhor.