Berlini paralajmëron se do të shfrytëzojë presidencën e Bashkimit Europian për të nxitur sanksione të ashpra ndaj Moskës, nëse nuk nis menjëherë hetimet për helmimin me Noviçok të liderit të opozitës ruse Alexei Navalny.br br Paralajmërimi vjen nga ministri i Jashtëm gjerman Hajko Maas, i cili në një intervistë për shtypin gjerman kërcënoi Rusinë se Gjermania mund të tërhiqet edhe nga projekti i gazsjellësit Nordstream 2.br br Ky projekt është kritikuar ashpër edhe nga Presidenti amerikan Donald Trump, sipas të cilit duke lidhur marrëveshje me Rusinë, Gjermania rrezikoi aleancën perëndimore duke i shtuar Moskës të ardhurat nga gazi.br br Paralajmërimi vjen pasi këtë javë, laboratori i toksikologjisë i ushtrisë gjermane zbuloi gjurmë Noviçoku në gjakun e Navalny. Moska i hodhi poshtë pretendimet duke akuzuar Gjermaninë për helmimin.br br Sipas Kremlinit, në spitalin e Omskut nuk u zbulua asnjë shenjë e lëndës së rrezikshme ushtarake të krijuar në periudhën e ish-Bashkimit Sovjetik. Ministria e Jashtme ruse tha se është Berlini që po pengon hetimet, pasi me përfshirjen në këtë çështje po manipulon provat.