“நீட் எனும் கொடுவாளால் சமூகநீதியை வெட்டிச் சாய்க்க வெறிகொண்டு துடிக்கின்றனர். கொடுவாளை ஏந்தியுள்ள யதேச்சதிகாரக் கரங்களை சட்டரீதியாக ஒடுக்க, அகிம்சைப் போரைத் தொடங்கியுள்ளோம்..!” - நீட் விவகாரத்தில் முதல்வர் ஸ்டாலினிடமிருந்து சமீபத்தில் வந்த வார்த்தைகள்தான் இவை. நீட் விலக்கு மசோதாவை ஆளுநர் ஆர்.என்.ரவி திருப்பியனுப்பியதால், கொந்தளிப்பின் உச்சத்திலிருக்கிறது தமிழக அரசு. இந்த மோதல் குறித்து, ஜனவரி 26-ம் தேதியிட்ட ஜூ.வி இதழில், ‘பவன் பாலிடிக்ஸ்; சூடாகும் தி.மு.க’ என்கிற தலைப்பில் கவர் ஸ்டோரி வெளியிட்டிருந்தோம். நாம் கூறியிருந்தபடியே, ராஜ்பவனுக்கும் தலைமைச் செயலகத்துக்கும் இடையேயான மோதல் முற்றியிருக்கிறது.