Më tepër se një vit pas vrasjes së një gruaje të moshuar në Patos, policia zbardhi krimin dhe arrestoi bashkëshortin. Namik Velaj 75 vjeç, u arrestua me akuzën e vrasjes për shkak të marrëdhënieve familjare të bashkëshortes së tij Vrekë Velaj 74 vjeçe.

Si të përfshirë në këtë ngjarje, policia ka proceduar penalisht edhe mjekun e Qendrës Shëndetësore të Patosit, I.T. Ndaj tij gjykata ka vendosur masën e sigurisë të pezullimit të ushtrimit të profesionit.

Ngjarja ka ndodhur në Janar të vitit të kaluar, kur pas një sherri për motive të panjohura burri i moshuar mbyti bashkëshorten duke i futur duart në fyt. Menjëherë më pas gruaja u dërgua në qendrën shëndetësore të Patosit, por pa mundur të mbijetojë.

Pas marrëveshjes së familjarëve me mjekun, ky i fundit dha si shkak vdekjen e gruas si natyrale. Pas gjashtë muajsh, vëllezërit e Vrekë Velajt denoncuan në polici e cila nisi hetimet duke zbardhur autorësinë e krimit dhe duke arrestuar bashkëshortin.